Día dos Dereitos da Infancia

Con motivo da celebración do Día dos Dereitos da Infancia, o alumnado de primeiro ciclo de Educación Primaria preparou con moito entusiasmo unha exposición dirixida aos nenos e nenas de Educación Infantil. Durante a actividade, explicaron dun modo sinxelo e adaptado á súa idade cales son os principais dereitos que teñen todos os nenos e nenas do mundo: o dereito á educación, á saúde, á protección, ao xogo e á igualdade, entre outros.

Os máis pequenos escoitaron con atención e participaron facendo preguntas. Foi unha experiencia enriquecedora que favoreceu a aprendizaxe compartida e o traballo en grupo entre diferentes etapas educativas.

Para poñer o broche final á xornada, realizouse unha presentación conxunta na que o alumnado interpretou para as familias unha canción especialmente escollida para a ocasión, relacionada cos Dereitos da Infancia. O ambiente foi moi emotivo, e tanto profesorado como familias destacaron a importancia de educar desde idades temperás no respecto, na solidariedade e na defensa dos dereitos dos máis pequenos.